印刷廠陸老闆今次邀請到他新入伙家裡吃晚飯的幾個人，原來都是事前面約。在兩星期前，我倆在香滿樓裡相遇，他便約我，他說剛從日本帶回來幾張精采雷射影碟和幾本荒木經惟的攝影集，會找一晚，約齊幾個同聲同氣老友，在他家裡熱鬧一下。

約會的當日早上，歌頓張在電話裡問我：「今晚陸叔請食飯，買乜嘅去呀？」

歌頓張這樣一問，令我愕然，因為我從來沒有想過這個問題。「做咩要買嘢去？」我說。

「今晚可能係佢生日喎！」歌頓張解釋。

「唔會啩，今晚係去佢屋企睇咸片咸書，點會係生日呀？」我實在不願意是晚聚會的嬉戲性質會改變。

「我記得有年佢做生日請食飯，都係咁上下呢個時候，今日九成九係佢生日！」歌頓張頗為肯定道。

「不如問吓編輯陳，佢今晚都會去，問吓佢知唔知啦？」我想進一步求證。

「我問咗喇，我打電話問晒所有人嘞。」

有時候真係服咗歌頓張，怪不得他在金融機構可以連做十年而不轉工，他優勝在不怕煩、不怕悶，願意做一切男人老九不屑做的事。我曾問他何以怎會有如此功力，他說此乃多打高爾夫球之結果。

是晚離開家門前，我打開衣櫃，取出那樽名牌古龍水，那是聖誕節與製片陳上大富豪抽獎得回來的，當晚花了千多元，就只取走這瓶男人香水。

我走路到街口超級市場，走入去在收銀機前排隊，輪到我之時，我在櫃檯前取了一盒雙層刀片，然後我請求該位收銀小姐用張花紙把我那瓶古龍水包起來，該位小姐一臉怨言對着我，眼睛顯然在說：「幫襯咁少，竟然叫老娘做嘢」。我明白她心裡話，很願意多買些可以放在口袋裡的物品，不過瑞士蓮朱古力並不放在身處範圍附近，環顧四週，唯一可買之日用品，卻非我日常需要，但我無可奈何仍買了那盒東西。那是甚麼？Durex是也。上次（前年）買了一盒，去了四次韓國、三次泰國、一次菲律賓、兩次台灣都未用完。然而我今回卻不能不買，因為我不把Durex放在該收銀小姐面前，她絕對不願意把我的古龍水包起來。

我跳上的士，告訴司機開去西貢。我從口袋裡拿出陸叔新居地址給他看。

陸叔在電話裡曾這樣對我說：「你同的士司機講，過咗白沙灣遊艇會，再前啲就見到牛尾村，第一個路口轉入去，有條斜路上山，係私家路，行到盡頭，由電燈柱向左邊數埋嚟第三間、白色鐵閘，那就係嘞。」此是世界上最長地址之一，我將之抄下來，一字不漏讀給司機聽，他便不難把我送到陸叔家門口。我按門鈴時，見到歌頓張正駕車到達。他載了得哥（沙塵超）、死火周和OK華來。

陸叔品味，猜不到相當高雅，在他這所坐山面海西班牙別墅內，放了不少古玩和玉石，叫我十分羨慕。中堂掛上丁雄泉畫裸女圖，decadent得來有死不悔改之意，這明顯是屋裡主人公開宣言和心聲。

陸叔要我對他室內裝修發表意見，我坐在客廳紫檀木明朝款式椅子上，還有甚麼話可以說呢？我留意到牆角掛着一個小相架，一張黑白舊相片旁邊寫着一行字：「一舉步不堪回首」，再仔細看照片中人，面黃骨瘦，穿着又皺又舊解放裝，我不用問，便想到那是陸叔於大陸文革時在幹校所拍的照片。

陸叔此時拿了一瓶白蘭地出來勸飲，只有歌頓張接過他一杯，其他人都說食飯時才飲。

八點鐘。連最遲來的編輯陳也到了，他一入來便遞一枝白蘭地給陸叔，跟住講幾句好意頭說話，原來當晚真是陸叔生日宴。「今日唔係我生日，真正生日其實係前日，我諗住今日編輯陳夜晚唔駛返報館，所以就改為今日請大家食餐飯。」

我終於為那瓶得自大富豪的古龍水找到最適合的主人。

陸叔家裡有三位傭人，那位順德老婦做餸菜，十分美味，我不由自主地頻頻舉箸；陸叔明知道我滴酒不沾唇，但他仍給我倒了一小杯，由於我略為肚滯，所以也願意飲一點點，試圖溶解留在口腔裡的膠液。

吃水果時候，陸叔徵詢大家意見：「睇邊部先？有部床板慶子演嘅《今夜波光燦爛》，果部戲喺日本好賣座。」

一聽到松坂慶子，大家就嗒糖，死火周把《今夜波光燦爛》這個片名用日語發音唸給大家聽，大家笑到幾乎把口中的水晶梨和提子都噴了出來。

陸叔的LD碟機駁了前後四個喇叭，音響效果冇得彈，但弊在《今夜波光燦爛》乃劇情片，對白多到無比，而松坂慶子又惜肉如金，大家飲咗幾杯「屎水」之後，已沒有耐性欣賞日本第一美人演技。

大編輯陳搓着自己肚皮說：「實實際際，搵部真刀真槍嘅嚟睇吓啦。」

陸叔笑笑口說：「睇LD機真係無得頂，好似現場一樣，我買咗呢副神嘢，得閒睇一睇，呢半年嚟多咗好多次。」

「陸叔，你出特刊叫人收工，而你一星期嚟幾次，因住你自己都提早收工呀！」大編輯陳提醒他。

「唔駛怕，你同佢定，陸叔朝朝練氣功，精神爽利，日日嚟都得呀！」我說。

「阿張就知道我啲嘢，你地都學吓氣功，真係好有料到呀！」陸叔邊說邊為我們播放一部在《PENTHOUSE》獲得四粒星的正片。故事講一個敵七個，壯漢與七美女流落在太平洋荒島上，終日無所事事，以造愛為樂。

「以一敵七，七七四十九，七九六十三，咁樣一年，一年幾多次呀！」陸叔口中唸唸有詞。

「咁嘅環境仲諗住捱一年呀？」大編輯窒住陸叔說：「你估你真係鐵人。」

「好難捱咩！？俾我都做到，我今年五十一歲，我自己計過，我前半生都做咗五千次啦。」陸叔自豪兼理直氣壯地說。

「好嘢，陸叔愈老愈堅！」OK華、得哥、死火周三人不約而同地拍手叫好，OK華更興奮到衝上前搭着陸叔膊頭，半抱着他。

「我十五歲破身，」陸叔一回憶起童年時在印尼生活情景，臉上自然流露出快樂容顏，「到十八歲時候，我已做了三百次，果陣時幾過癮，有兩個女同學鍾意我，我一三五陪一個學印尼文嘅，二四六陪另一個學荷蘭文嘅。不過，有咁耐風流就有咁耐折墮，我返大陸住咗成十八年，頭三年仲有得做，識咗個上海妹同學，做咗廿次左右，但跟住果十五年，就慘絕人寰，加加埋埋做咗唔夠十次。」

「咁你落嚟香港呢十幾年，咪做咗四千幾次咁多，」OK華對年紀已五十過外的陸叔羨慕不已。

「係呀，差不多日日做，補番舊時喺大陸完全冇得做果條數。」陸叔說一個人一生做五千次係基本數，以後做多一次就係賺一次。

「你人生個目標係幾多次呀？」我問。

「我唔想定一個目標，咁樣俾自己一個壓力，做起嚟太過機械化，有乜樂趣。我估計仲可以做十零年，六千次一定唔止，或者有機會接近七千次。」陸叔對自己將來以及香港將來都同樣十分樂觀，怪不得他今年又買新屋，又擴充寫字樓。

健力士世界紀錄大全沒有造愛次數紀錄，但陸叔做六千幾次（或者七千次），在香港來說，應該有力爭到前列位置，至少可以與陳欣健一起晉身入十強名單裡。

陸叔頭髮見白，侃侃暢談他武功，OK華愈聽愈慚愧：「你咁犀利，不如過番我兩招啦。」

「我教你，」陳大編輯搶先一步說：「你唔駛練氣功，又唔駛食補品，一晚都可以做七十次，咁樣好快便接近陸叔六千幾次的零頭。」

一晚做七十次，有冇搞錯！大家都說陳老總作大。

「冇作大，我呢個方法特別為唔肯用功、又唔肯盡全力嘅人設計嘅，」陳大編放下手中酒杯，雙手在空中比劃着說：「好似OK華咁識撩女仔嘅人，可以先動口，嚟一個69姿勢，咁樣做一下就等於做六十九次，之後臨天光再做一次，咪夠晒七十次囉！」

陳老總食鹽多過我們食米，老謀深算，兼閱歷豐富，他講笑話，令我捧腹上下氣不順，有點辛苦，而阿得和歌頓張，更拍掌叫好。

在二十八吋大螢光幕前，看由雷射影機播放春宮片，特別加多幾個錢肉緊，當晚大家由於都飲了幾杯「屎水」，各人反應特別熱烈。OK華第一個投降，埋怨說：「今晚死啦，有冇地方搞掂。」

饑渴這件事很易傳染，一個人傳出來，其他人自然有同感。

「不如咁啦，……」，陸叔見大家慾火焚身，終於作出建議。他走去打電話。

之後，我們分乘陸叔和歌頓張兩部車，開到沙田河畔酒店去，我們各自進房。

我脫下皮鞋，按開電視機。然後入浴室洗一洗面，聽到電視機傳來何守信說話：「今晚大家都好開心，一齊慶祝歡樂今宵五千次。」

這個世界沒有烏托邦，明天各種環境會比今天更壞。所以EYT五千次，幾乎已經是我們人生目標。至於略為不幸的人，如果不能ENJOY YOURSELF TONIGHT的話，也至少EAT YOURSELF TONIGHT？

十九世紀末紐西蘭哲學家卡迪兒（Kadichee）說：「我造愛，故我在。」這句話（如編輯陳所說）實實際際，確是十分適合今日香港人的心態。

#####

[ #1987 #張氏起居注 ]